2Cor 2 | MHL | STEP | Naapeya yo kema-pa maem, yo nainiw yoowa niemi ikiwowa me erup arinen.

2 Corinthians 2

1 Naapeya yo kema-pa maem, yo nainiw yoowa niemi ikiwowa me erup arinen. 2 Oko ni kema nia samorinen-na yo naarew wiamiya ikok kemelowa aawinen. Moram teeria nain nan nia samoram. 3 Ni muuta nain yo kemelowa aawiyem. Ni sira niam kakeniwkin yo ikiwemi kema me nia samorinen naep parosifa oko iiriw nia siisimomam. Moram nia amisarem, ni unowiya yo kemelamkun nis pun kemelowen. 4 Aria yo mokomokoka parosifa nia siisimomam nain manek akena kema moke ikok omow eka onaiya siisimem. Nain me ni kema nia samorowa naep siisimem, weetak, nis-na yo manek akena nia kookaliyem nain efar amisareka naep.

Mua sira samorak nain kakenamik, nain maek

5 Aria mua eena sira samora onak nain, yo yaisow kema me efa samorak, weetak, ni unowiya kema nia samorak. Nain o pina maneka-pa me wuinen. Feenap maep-puinen, o kema nia samorak, nain yo pina senam me wiar aakuninen. 6 Ni mua unowa o ifana iiriw wareman, muut

naap. ^{▼▼2.6Pol parosifa mokomokoka wi Korin wia siisimomak nain mua eena wiawi emeria enuma wiar aawok nain maek. Wi Korin parosifa nain urufap mua nain opora-pa wuami kakenamik. Naapeya Pol sira wiar amisarep mua nain kiiriw me samoruk naep opora nain siisimok.} 7 Ne aakisa o sira onak nain ni niena kakenap opora umukami sira eliwiw saliweka. Oko o kema iiwawun samorar-afurinon. 8 Ne naapeya nia maakiyem, ni sira eliwa iwiwkin mainok, “Wi efa kookalimik,” naap mainok. 9 Yo nia akimekam naep maa muutitik nia maakem, ni opora baliwep efar ookowen-i e weetak. Yo nain naep parosifa nain nia siisimomam. 10 Ne ni mua-ko pina nia oneya me kiripomowen-na yos pun naap, o sira samora onak nain me wiar kema suuwinen. Nain yo nia naep Krais mokoka-pa o pina marew nainen. 11 Moram Satan woosa i manek akena wiar amisaremik. I me yiam saliwiyen-na os-ke sira samora-pa yia pikiwinon. Naap me yia oninok naep maiyem.

Pol Troas-pa ikok Taitus me imenap kema unu-unowa wuak

12 Ne yo Krais opor eliwa wia maakowa naep Troas owowa ikiwem nain iiriw yiena Maneka-ke era dubilap-puomeya ikua. 13 Nain emar Taitus nan me imenap kema unu-unowa wuam. Naapeya ni feek ikeka wia naakep-puami Masedonia ikiwem.

14 Makena yo kema unu-unowa wuam, nain Mua Maneka sira eliwa naakiyem. Krais-ke maa muutitik nomakeya maa unowa o tepak-pa wiar ikua. Naeya i Krais wameiya yia wueya os-ke yia miimomaya uuw-ikim-ikaimik, naapeya is pun nomakemik. Ne i owow unowa ikiwemi Krais opora manekami wia maakimik. Opora eena maa ikin eliwa saarik nain. 15 Moram i uuwowa eena ikin eliwa feenap saarik, Krais wapena-pa ikina-ke urupemi Mua Maneka miikapura wiar iriya. Ne ikin eliwa nain-ke owow unowa wiar ikiwiya. Mua Maneka-ke wia aaweya wi me mesenalimik nain ikin eliwa nain muurap muep orowawimik. Ne wi mua mesenalimik nain ikina nain muurap beel ikina-ke naemi gaep ekimik. Se-ek, Yeesus Krais opor eliwa wiar piawowa nain uuwowa eliw akena. Nain mua naareke pepek? 17 Ne wi mua papako Mua Maneka opora sesa aawow maa saarik wiar puukowap nainiw wiena sesa imenowa uuwowa onimik. Nain i sira naap me onimik, Mua Maneka ona yia sesekeya Krais uuwow mua kakeniw wiar ikok ona mokok epa-pa o opora makeniw wiar maem-miawimik.